MUALCHENG HERITAGE SITES (MIZO VERSION)
Source: Serchhip District chhunga Pipu sulhnu leh hmun hmingthangte
Published by :Serchhip District Academy of Letters, 2009
Lallula artah kawn
Sailo lal ropui tak Lallula thlang tla chu artah kawnah hian an chawl a, hetia an chawlh lai hian Lallula’n a ar duh tak a ken chu an tichhuak palh ta a. An man leh thei si lova, Lallula ui lutuk chu helai hmunah hian a tap ta ringawt mai a ni. Lal ropui leh hmingthang takin ar a han tah takna hmun anih avangin lallula artah kawn tih a ni ta a, helai mual vel hi Lallula artah mual tia sawi a ni bawk. Mualcheng atanga N.Vanlaiphai lam km 2 vela hlaah a awm.
Lal Saihnuna Thlan
Mizo Pasaltha hmingthang tak Saihnuna, 1982 kuma thi lungphun a ni a, field bul lawkah a awm a ni. Saihnuna hi N.Vanlaiphai leh Leileta a lal hnuin Mualcheng leh Bawktlang lal a ni leh a. Mizo zinga Sakei kap tam bera sawi leh pasaltha huaisen tak a ni. Sakei 15 a kah zingah 9 chu a ruang hlawm a ni, amah hi hla phuah mi a ni bawk.
Liankhama Bung
He Bung awmna velah hian Lalkhuma a lal laiin pa hausa tak vawi hnih lai Khuangchawi thei Darhuaia a awm a. A fapa Liankhama a neih chhun chu nupui nei, fa nei hman lovin a thi a. A thlan bulah chuan Bung a phun ta a. He bung hi Mizorama bung hming nei zinga a upa pawl leh lian ber pawl anih a rinawm. Tehkualin 27ft leh inches 4 lai a ni a. Kum 1850-1870 vela phun a ni a, kum 130 zet chu a tling tawh a ni.
Salaia Pa Lung
Liankhama bung thlen hma km 1 vela kawnah, hmanlai lal emaw pasaltha emaw ni ngei awm thlan, milem mak tak taka ziah a awm.
Saikuti Pianna Hmunpui tlang
Chhim lama hla phuah thiam hrang hlui pakhat Saikuti kha, helai tlang hmunah Khawtindala a lal laia piang a ni.
Chhura talhtum
N.Vanlaiphai kawngah hian Artah kawn pelh hnu lawkah mual dung nuam tak a awm a. Chu chu Talhtum tlang tih a ni. Hetah hian lung mum mam lian tha tak, Chhura'n Vanlaiphai a vuak zawlna talhtum bung an tih chu a awm a. Hmanlaiin Chhura’n Champhai a zuak zawl zawhah N.Vanlaiphai hi vuak zawl leh a tum a, a vuak zawl zau hmain a talhtum a bung ta a, a talhtum bung chu he talhtum tlangah hian a tla ta a ni an ti.
Hmar thah lui
Mualcheng khaw hnuaia lui te tak te, Varhva luia luang lut lui hi a ni a. Hmanlaiin Chhim leh Hmar indo laiin chhim lam ralin helaiah hian mi pahnih an thah avangin ‘Hmar thah lui' tih a ni.
Thinglehkhai
Kanhlum mual leh Lungchhuan ram inkar kawrah hian hmanlaiin thing pakhat, a zar ina chung lam hawi lova lei lam kawk sung mai hi a awm a, a zar kha a letlingin a inkhai vek mai a. Chuvang chuan a awmna kawr hmingah ‘Thinglehkhai kawr’ an tih phah ta a ni.
