LENG KHAW CHANCHIN
Written by
Lalfakzuala
VLAA, MGNREGA
East Lungdar R.D Block
Location: Leng khua hi Mizoram chhimchak lama awm a ni a, Serchhip District-a awm a ni. Hmun zo nuam tak tlang cham nuam taka awm a ni a, Thingtlang lo neihah thlawhhma kawng chhuk chho a awm lo va, thingchang hmun, mau leh rua te pawh awmna a ni.
A ram rite: Khawchhak lamah khawchhak tuipui a awm a, Zawlsei ram nen a inri a. Khawthlang lamah Mualcheng khua a awm a, Chhim lamah Sailulak khuate, Hrangturzo tlang (1954m) te,thlang lamah N.Vanlaiphai te, Bawktlang khua te an awm a. Hmar lamah E.Lungdar Khua te an awm a ni. A sangzawng hi 1320m (4290ft) a ni a,Latitute 93 E vel leh Longitute 23 N vela awm niin,Zo boruak nuam tak a ni.
Lal lal laiin hetiang hian rin a ni. E.Lungdar bul Palungkawn atangin chhimthlang lamah Suangawk lui zawh thla zelin zuva lui a pawhthla a, Zuva lui zawhtla zelin,Liandova te unauvin Saphai (Rulpui) an hmuhna Pangphir zawl thlen hma deuhva lui lo chhuak Lawmlunglui chu khawchhak lam hawi deuhva zawh chhovin vawkkahlui a zawh zel a, Lengthuam kawna chhuak chhovin khawchhak lam hawiin Lengthuamlui a zawhthla a, khawchhaktuipui a pawh thla a, khawchhaktuipui hnar lam zuiin Arsilui lo chhuahnaah tawpin arsi lui a zawhchho leh a,Pialtleplui zawh chho zelin lailen hmunhlui bulah motor kawng a pawh a, motor kawngpui zawh phei zelin Palungkawn (P&E Sub Station) a pawh phei leh a ni.
Leng khaw ram hi lo neih atan hman tlak loh ramchhia awm lovin hmun remchang deuh vek a ni a, a thenawm khua Sailulak ram nen tehkhin chuan ‘Saruhkawl leh sathin ang a ni e’ an ti thin.
Thing tam tampui pawhin a nuai na ve lo va, Nula leh tlangval hlim tak maia an leng dual dual thin a vangin LENG KHUA tih chu hming a lo pu ta a ni.
Leng khua a lo din hma hian mi hmasaten BAWK neiin hmun an lo nei tawh a, chungte chu an hun hriat chian theih an ni tawh lo.
- Taithara Ani hian Leng-E.Lungdar kawngpui chungah Bawk neiin enge maw chen a awm a, khawi lamah nge a kal tak zel hriat theih a ni lo. Tun thlengin a lo awmna tlang lianpui chu TAITHARA BAWK tih a la ni ta zel a ni.
- Lalvunga Ani pawh hi a hun lai chiah hriat theih a ni lo va, Leng khaw ram khawchhak lam tlang dung nuam tak chu Bawk mual ram tih a la ni ta zel. Hemi hmunah hian Thlan te, bel keh them te, lungthu hlui te,hmuh tur a la awm a, he tlangdung cham tha tak hi ‘LALVUNGA BAWKMUAL’ tiin sawi a la ni.
Hun hmasa lam kum 1880 Thing tam kum lai velah khan Fanai Lal Dokham fate pali Zaduna, Lianchema, Zakapa, Pazika te unau ho hian khua siamin in 700 lai an awm khawm a.
Dokhama fate chu an lo inthen darh leh ta a,an upa ber Zaduna chu Leng ram tho Sazuk hmunah a kai phei a,rei awm lovin Biate lamaha phei leh a. Heta a awm lai hian Vai lian Hotupa Tarmita chu Sial a talhsak nghe nghe. Chuta tang chuan Khuangthing lamah kai chho lehin a inbengbel zui ta a ni.A unaupa Lianchema chu Lungkawlh lamah a kai ve ta a, Sakapthei Pasaltha a ni a, Sazim niah te hian amah Lal lo ni bawk chu a khan tha berah an chanhtir thin a, tun thleng hian Lungkawlh ramah chuan ‘Lianchema Sachan khan’ tih an la nei a ni. Lungkawlhah chuan a inbengbel zui ta a ni.
An unau zinga a naupang pahnih Zakapa leh Pazika te chu Khawhri lamah an phei a, in 200 lai khua an ni a, Zakapa chuan Khuangthinga a u Zaduna chu a panchho ta a.A unaupa Pazika erawh chu hmar lam Lal Liankhama Vankal/Thiak (tunah Zaingen) Lal chuan a khuate in 60 lai nen pem turin a sawm a, an kal ta a. Liankhama khua in tam tak chuan Pazika leh a khuate tan chuan Buh an khawn khawm ta a, khawlaiah buh chhipzawn lai an chhungkhawm ta thur mai a. Tlai leh puar takin an awm ta a ni.
Pic: Khaw sat/dintu Pazika thlan Pic : Saihnuna thlan Pic : Lalchuanga thlan
Hetih lai hian Pazika chuan kum 1896-ah fapa Saihnuna a nei ta a. Vankal/Thiak (tunah Zaingen) atan chuan an u Zaduna Khuangthing a mi chu a pan chho ve leh ta a.An Unau 3-in an awm ho ta a.
Vailian hotupa J. Shakespear ( Tarmita) Mizovin Tlangsemsap an tih chuan kum 1898-ah Lalna tlang la nei lote chu tlang/ram a ruatsak a, Pazika chu Leng ram a pe a,a unaupa Zakapa chu Sailulak (Hlingvawm ) ram a pe bawk. (Tarmita’n Leng ram Pazika a pek hma hian “Chhamphai zawl zawng zawng khi ka pe ang che, i duh em?” tiin a zawt a, Leilet hlutna la hre lo nafam chuan “A ! heng zawl mai maiah hian Buh ei tur engtinnge ka neih ang?” a ti a. Tarmita chu a nui a, a nih leh Leng ram hi ka pe ang che a ti ta a ni. Pazika hi kum 69 niin 1927-ah a thi a, a fapa Saihnuna’n a ai awhin 1928 atanga 1949 thleng a lal a, , a hunlaiin sorkarin hnathawk tha leh mitangkai nia a hriat avangin elhbun laiphir an pen ngat a ni. Kum 1949-ah Saihnuna hi kum 54 mi niin a thi a,a fapa Lalchuanga chu 1949 atanga 1954 Lal ban thlengin a lal ve leh a, ani hi 1986-ah kum 71 mi niin a thi ve ta a ni.
LENG KHAW DIN LEH A HNULAM
Tarmita’n Leng rama Lal tura Pazika a ruat khan Khuangthing atangin Balhla mualah an awm phawt a, chuta tangin Pavailungdawh velah an awm leh a, kum 1905-ah hmunsang YMA Park-ah an kai a,1916-ah Theite hmunah Saihnuna chu in 30 nen a indang. 1918-ah Bawrhsap Colcohun-a’n Sailulak kawnah ramri a siam a, (tlang sem hmasakah chuan Taui thlengin Pazika ram a ni. Sailulak kawna ramri a awm lai hian kum 2 vel Saihnuna hi Lengthuam tlangah a awm.Kum 1920-ah Bawrhsap WL.Scott-in Lengthuam kawnah ramri a siam nghet ta a ni.
Kum 1920-ah Hmun laita Lianchema hmun(Tuna kan awmna)-ah hian Saihnuna a kai leh a,a pa Pazika chu Hmunsangah a la awm. Kum 1933-ah Theite hmunah an kai a,1937-ah Hmunsangah an kai leh a, hei hi Leng khaw awmnghehna a ni ta a ni.
LENG KHUA MIPAWIMAWHTE TLAWH KUM
1.Kum 1903-ah Major J Shakespear (Tarmita)
2.Kum 1904-ah Rev JH.Lorrain (Pu Buanga), Thuhriltu- Dokhama,Phaisama,Bawichhuma
3.Kum 1910-ah Rev Sady (Pu Dia)
4.Kum 1920-ah Bawrhsap WL.Scott
5.Kum 1925-ah Mrs. Zomawii (Missionary Sap nula)
6.Kum 1926-ah Thuhriltu hmingthang Thangbawnga
7.Kum 1928-ah Rev EL.Mendus ( Pu Mena), Bawrhsap Perry Sap
8.Kum 1942-ah Rev. Samuela (Misionary Sap)
Pu Samuela hian sakawr leh puakphur tam tak a rawn hruai a,Petromax a rawn keng a, Biak Inah chhit a ni a, Mipuiin mit la lek lovin kan en a, Leng khuaa PUMP chhitna hmasa ber a ni.
9.Kum 1945-ah Bawrhsap Mac Donald, Sapte Buchhawna
10.Indopui II hun chhung 1943-44 lai velah Sap sipai Col. Awt-a te, Col. Ut-a te. Leut. Col. Haliday(Sapte a) te leh sap sipai tam takin Lengah hmun khuarin an awm thin.
LENG KHAW RAM CHHUNGA DILTE
1.LENGRIH DIL He dil hi Leng ram leh Lungdar inkar kawng thlang lamah a awm a, Leng khua la din hma kum 1893 Minpui kuma insiam niawm tak a ni. Upate sawi dan chuan he dilah hian Saihliam ngho sei pui pui neite chuan an ngho thate chu an tlanluhpui thin an ti.Sainghote hi an ha dangte anga chhe mai thei lo nise chuan he dilah hian Saingho hmuh tur tam tak a awm ngei ang.
He dil lo pian dan chanchin dang leh chu he dil siamtu dilhuai hi Sepui rang lian takah changin hmar lam ram hla tak atangin a lo kal a,a note chu hetah hian a thlauh va, a hnuchhiah ta a, dil lian tham takah a insiam ta a ni.Amah tak chu khawchhak lamaha chho zel a, dil hmingthanga tak siam turin Rihdil hmunah khian a innghat ta a, a note a thlauhva, a hnuchhiahna hmun chu Lengrih Dil tih a lo ni ta a ni.
2.SIHPUI DIL He dil hi kum 1929-a awm tan a ni a, hemi kum hi Minpui kum tih a ni. (THING TAM KUM) an ti bawk. Ruaha sur nasa em em a, ni 7 chhung a sur a, Mizoramah ram hmel danglam khawpin min a tam a ni.
Leng khua atanga km 1 velah sih tam tak awmna Sihpui ruam a awm a, chulai ram vel chu nasa taka minin min tawlhna thlang lamah chuan dil lian tak SIHPUI Dil a siam ta a ni. Pa titi thiam deuhte chuan hman lai chuan dilhuai neite leh rulfep neite pawh awm tawhin an sawi ve zu nia !
LENG KHUAA NGO-TE DIN KUM LEH HRUAITUTE
YMA hi 1939-a din a ni a, kum 2014 hi kum 75 a tlin kum (Platinum Jubilee) a lo ni ta. President hmasa ber chu Pu Lalchuanga a ni. Indopui II (1939-45) chhung chuan indo buai leh raltitna hrang hrang avangin hmalakna a chak thei vak lo va.Indo reh hnu lam atang chuan YMA-ten hmalakna tam tak neiin khawtlangin hma a sawn phah ta em em a ni. Khawtlangah chhiatni tahtniahte neitu ber chan changing khawtlang min kaihruai a, an thla zar hnuaiah khawhchhung mimir zawng zawngte thlamuang takin kan khawsa thin a ni.
Tin YMA hian 1979 kum atang khan hmarlam kawtchhuahah Reserve tha tak an siam a,chumi inzar zawm chuan MUP te, MHIP te, YMA Chhang ten an nei bawk a. Khawchhung luh dawnah hmun mawi tak a awm a, milian mite khual atanga lo kalten an fak nasa thei hle. Khawtlang timawitu a ni.
Tin, YMA Library hi 1988 khan Regn. No. 124 neiin a awm a, tunah chuan khawlai li takah RCC Building chhawng 2-a sak niin khawchhung a timawi em em a ni. Tunah hian lehkhabu 2000 vel dahkhawm mek a ni.
NGO dang MHIP te, MUP te pawh nung takin a ding a, khawtlang tana theihtawp chhuahin
an thawk zel a, MUP chuan Pu CL Ruala MP (LS) Fund hmangin RCC Building tha tak an nei.
Leng khuaa NGO-a President hmasa berte
YMA - Pu Lalchuanga 2. MHIP – Nl T Vanlalmuani 3. MUP – Pu Paluaia
RORELNA LAM
Leng khaw din ngheh tirh 1898 atanga 1954 thleng Lalten kum 56 chhung ro an rel a, (Pazika – 29, Saihnuna- 22, Lalchuanga-5)Mizoramin Politics a lo hmelhriat tan ve ta a, kum 1946-ah Mizo Union Party chu April 9, 1946-ah alo ding ta a, ram rorelna lamah hun thar a lo thleng ta zel a. Mizoramah Advisory Council membr 35 awmna chu April 15.1948-ah thlan an ni a, District Council inthlanna hmasa ber chu April 4, 1952-ah neih a ni ta a, Mizoram Lalte chu District Council chuan an thuneihna chu kum 1954-ah chuan a titawp ta a. An aiawhtu Village Council thlanna neih a ni ta a ni. Leng khuaa VC inthlan hmasak ber April 4, 1954 a ni. R.O chu Upa Thangzova Lungdar a ni a, Ballot Paper Seal chhut nan pawisa thir (SIKI) a vawnnaa char beh stampad-a chhut kai hman a ni. Chuta thlan tlinte leh inform dan chu –
President - Pu Hlawnchhinga
Vice President - Pu Nawlsanga
Secretary - Pu Lalrova
Members - Pa Luaia, Hrinfaia, Tleikhawzama
LENG KHUAA VCP LO NI TAWHTE
- Hlawnchhinga 2. Lalchuanga 3. Lalthanga 4. Kaihranga
5. Lalringthanga 6. Bawikima 7. Nghakliana 8. Vanlalsiama
9. Lalrinsanga 10. Rohnuna 11.Remkima 12.Nghakliana
13. Zohuthanga (Nghakliana hi tum 2 a VCP a ni)
LENG KHAW VANDUAINA TAWHTE
- Mahni inkaphlum te, inawkhlum te,tuitla te, thingtla te, kanghlum te kan tawng tawh.
- Kangmei April 3,1951 chawhma dar 11 velah chhungkaw in 10 leh Presbyterian Biak In a kang a,naupang khawlai leng thei rual a kanghlum a, hemi kum hian Balhla Mual leh Chengpui Tuipui kam neih kum niin Lo a hlat avnagin inking thelhtu an awm si lo va, amaherawchu khawthenawm Sailulak khuain Dapzar phei an neih kum a nih vangin Lo atangin mi tam tak an lo tlan phei a, in kang zel turte an rawn veng thei a, a lawmawm em em a ni.
A dang leh chu 1964 kum tir lamah khan Inkan kan tawk leh a, zanmu te inauharhin khaw mipuiin kan thleh thei a, in thum(3) a kang ral, in pathum sawithiat a ni bawk. Tin, heng bakh hian mimal inkan te pawh kan tawk bawk.
LENG KHUAA MOTOR LUH KUMTE
Kum 1959 Mautam tam chhawmdawlna atan Sorkar tangin Buhfai tam tak kan dawng a, chumi rulhna atan chuan Motor kawng kan lai ta a, tuna Kawn veng atanga Hmunsang inkar hi chu kawng a zausa deuh va, tlema han tihthat deuh chuan Motor (Jeep) kal theihna a ni nghal mai a. Tuna Pu Laltanpuia Kawmthlangah hian Kawng sirah char kung lian tak hi a awm a, a bul vel chu lung lei deuh tak a awm avangin bul tan nan hman a ni a. A piah lam zel chu Peg khengin laih anih bakah hnatlanga laih a ni a, Mautam Vur kum 1960 kum tharah chuan E.Lungdar thleng chu kan lai tlang ta mai a.
1960 thal laiah Pu Bawnthanga Development Officer chu Lengah Jeep-in a lo lut ta a ni. Motor lian TMB kal theihna tur chu kum 1977 lai vela Mizoram President’s Rule-a kan awm lai khan kan khaw thenawm a mi Pu Lalkhama IAS Chief Secretary chuan min duhsak em em a, sorkar tanpuinain kawng lian zawkin kan chhunzawm leh ta a,kan ram chung kawng hi kawngko sang tak tak te awm lo tlangkhan tha tak a nih avangin kawnglaih a awlsam a, kum 1977 atanga tun thleng hian motor kal tyheih lohva min leh kawngthlang lam chhia pawh a la awm ngai lo a ni.
Tichuan April 24, 1979 MLA Candidate Pu Rochhunga chu TMB-in a rawn lut a ni.
MST Bus No.ZRX 143 chu April 21,1984-ah a lo lut ve leh a,
Leng khuaa Electric hawn - Feb.27,1986, Hawngtu - Pu CL Ruala Minister P&E,etc.
Sub Centre hawn – 1979, Hawngtu - Arora Health Director
THIL LAWMAWM LAM
Leng khua hian hmasawnna leh changkanna lamah mite khumin awm lo mah ila, sorkar atanga tihtur thil tha lamah te chuan theih tawpin hmanlak a ni ve thin a, hengah te hian khawtlangin chawimawina lawmman te a lo dawng tawh a ni.
1. India ram chhunga khawfai lawmman 2009
2. Tuihna humhalh tha lawmman 2013
3.Ramngaw leh nungcha humhalh tha lawmman 2013
(Heng lawmmante hi YMA hmalakna vanga lak vek a ni)
INFIAMNA LAMAH
Infiamna lamah Leng khua hian hnuhma lian tham em em a nei lem lova, Team work lamah chuan kum 1986 Tuichangral Games Football-ah (hemi kum hian Tuipui ral zawng zawng nen an inkhel) Vanlaiphai hnehin an champion a, Block PYKKA (tuna RGKA ni ta)-ah hian sorkar lakpui tangin tanpuina dawng thei khua an thlan chhuah zingah kum 2009 atang khan an tel ve bawk.
Nl Laltluangkimi d/o Laltanpuia chuan kum 2009 bawk khan National Junior Wushu Champhionship-ah Silver a la a, 2014 kum laihawl vel khan Indian Wushu Federation cup-ah senior level-ah silver a la bawk. Heng bakah hian Northest leh rampum huapin medal a la nual bawk.
THLAI THAR
Leng khaw michengte hi an eizawnna ber chu loneih a ni a, in 27 vel hian leilet neiin Zuva luiah an nei a, Zuva lui hi a lui tet ngaihtuahin leilet a chhawp chhuak tam hle. In tin deuh thaw hian serthlum huan neiin kum 2013 ringawt khan Rs nuai 45 vel lai man an hralh thei a. Khaw in zat chhuta serthlum atang ringawta sum lalut hnem ber khua an ni mai thei a ni.
SORKAR SCHEME
Leng khuaah hian sorkar hna (post) a awm meuh lova, kum 1924 vel atangin P/S din a ni a, tun thlengin ala awm a, 1964 atangin District council-in a la a, tin, M/S hi kum 64-ah dinin kum 1991–ah sorkara-in a la ta bawk. H/S chu kum 2000-ah dinin tunah hian Gran d-in-aid –ah hlan kai a ni tawh bawk.
Kum 1979-ah Health Sub-Centre neih tan a ni bawk. MGNREGS (ni 100 inhlawhna) lo chhuah hma chuan sorkar scheme hrang hrang hmangin hnathawh a ni ve thin a, Border bula awm kan nih vangin BADP sum hmang tein hna hrang hrang thawh a nih bakah kawng tam tak laih a ni tawh bawk. MGNREGS lo chuah meuh chuan hmasawnan hna chu a kal ta zawt zawt a, in tin neih serthlum huanah khur te laiin serbi laih zawl (Halfmoon Terrace) te laih a ni bawk. MGNREGS scheme hnuaiah hian kan tui;ak hnarah tuihna khawl/chelh din nan khur(pits) laih a ni bawk.
Tin, IAY tanpuina hmangin mi harsa in tam tak sak a ni tawh a, IWMP Self Help Group ten sum pukin eizawnna hna mumal an neih theih phah nasa hle bawk.
