LUNGCHHUAN HERITAGE SITES (MIZO VERSION)
Source: Serchhip District chhunga Pipu sulhnu leh hmun hmingthangte
Published by :Serchhip District Academy of Letters, 2009
Bak Puk
Lungchhuanah hian Bak Puk hmingthang tak erawh a awm thung. He Puk hi Lungchhuan khaw daichhimlam kawtchhuah kawng chhak lawka awm a ni a, a awmna lai hi khua atang hian minute 10 vel kal a ni. He Puk kawngka zau zawng hi 8ft vel a ni a, a kawngka atang hian a zau tial tial a, a thuk zawng hi tun thlenga finfiahna mumal tak a la awm lova ft 100 thleng vel kal ngam erawh chu an awm nual niin an sawi a, mahse he puk thuk zawng dik tak leh engtiang chiaha ropui nge tih hi chu tun thlengin finfiah a la ni lo a ni.
Zopui khaw hmun hlui
Lungchhuan tlang nena inzawmin Lungchhuan atanga hnai teah hian Zopui tlang an tih chu a awm a. Hei hi hmanlai a Sailo lal, Thlanrawnho rawt chiamtu Lallula inbawkna hmun hlui a ni a. Kha tia Lallula’n a Zopui khua a Thlanrawnho a rawt chiam hnu khan a thlang tla zel a, tuna Lungchhuan ramah hian a inbawk a, he a inbawkna hmun pawh hian Zopui tih hming bawk a pu leh ta a ni. Helai hmun hi rambuai hma khan khua a ni a, tunah chuan a ram tawh.
