EAST LUNGDAR
Reference : Serchhip District chhunga Pipu sulhnu leh hmun hmingthangte
Published by :Serchhip District Academy of Letters, 2009
Lung Vando:
Hei hi lung mum pel pul, Ft 7 1/2 (sarih leh a chanve)- a sang a ni. A bulah hian a bung nimai awma mawi lung pahnih a awm bawk. Lungdar atanga km 5 vel, Biate khaw lam kawng bulah a awm. A laia hawlh tlangin feet khat leh inches sawm a ni. He Lungvando phun a nih dan hi British leh Burma indo lai vel Second Burmese War 1824-1826 tawpah khan British hi chak zawkin Treaty of Yandaboo 1826-ah (inremna) an ziak a. Chumi ang chuan ramri lung an phun ta a. Chuta an lungphun chu niin a sawi. Hemi chung changah hian Lungdar pitar thil hre ber, Pi Chhunhnuaii kum 1986-a thi ta khan ti hian a sawi bawk, “Kan naupan laia ka piin mi hrilh dan chuan Lungvando phun tute chu Kawlho(Burmese) an ni a. Sai tam tak an hruai a. Heng lung te hi sai chu an hnuhtir thin..." a ti.
Lalruni Tui
Tuna Lungdar tlang Field bula tuikhuah awmnaah hian tuikhur a awm a, chu chu Lalruni tui an ti. Lalruni pa hi Rolenga a ni a, Rolenga chu Vuta hnuaiah ‘Sangal khawng hrang, bel rawh mual kil,’ an tih hi a ni a. Chutiang mi chu lalin an duhsak te, Fathang leh sachhiah ei theia an awm hran tir hi a ni. Lalruni chu nula hmeltha tak a ni a, he tuikhurah hian zan mut reh hnuah a inbual thin a. Chuvang chuan Lalruni tui tih a ni ta a. Tunah chuan PHE Department in tuikhuah mawi tak an siam ta a ni.
Ruhchiah kham
Lungdar khaw tlaklam, km khat lekah hian kham, puk pawh nei a awm a. Hetah hian mihring ruhro tam tak a awm thin. A puk hi chuti taka ropui a nih loh avangin a kham hian a hmingah puin Ruhchiah kham an ti.
Lungrek
Tunhmaa mihring chengte sulhnu tih hriat, mahse a titu hriat theih tawh si loh, lung kak(rek) hi a awm a. Tuipui km 5 vela hlaah a awm. A inphun a, ft 3 bial vel leka lian a ni.
Pu Chawnga lung
Mizo zinga tawnghriatloh nei hmasa ber Pu Chawnga, Lailen hmuna an awm laia thi ta thlanlung a ni. Lungdar atanga km 3 vela hla leilet bula awm a ni. Pu Chawnga hian kum 1932 ah khan tawng hriatloh hi a lo hmang thin tawh a, a hming pum hi Chawngthura nia sawi a ni.
